قصة قصيرة · بالفلاقي

الحُرِّيَّة في عام 2040


قعدت السنة اللي فاتت كلها من غير أي تواصل اجتماعي افتراضي، هذا تحدي داراته أمي من عشرة سنين فاتوا، ومنها معاش استعملتْ النت في مواقع السوشال ميديا، حبيت نعاود تجربتها رغم ان الكل اتهمني بالجنون، وان هذا شي مستحيل في الـ 2040، لكن قدرت، وشن اكتشفت؟

Continue reading “الحُرِّيَّة في عام 2040”

Advertisements
بالفلاقي

آلة ذكية!


large (1)
أكثر حاجة نفتقدها في تلفوني “الذكي” اللي مات (Galaxy note 2) هي المنبه “الذكي” اللي فيه.. يرن وما يطفاش الا لو حليت عمليات حسابية و كتبت عبارات معينة بالاحرف الكبيرة والصغيرة والفواصل بالضبط زي ما مطلوب مني، لو غلطت كان صوته يعلى، ولو جاوبت غلط نفس الشي صوته يعلى، ومافيش مجال إنه يطفى الا لو حليت المشاكل اللي قدامك …
تلفوني الحالي “مانببيش نوصفه بالغبي حرام، يكفي انه متحملني”، دايرة فيه 4 منبهات بمواقيت مختلفة.. اخر واحد فيهم سميته “تي نوضي!! ” على اساس ضميري بيصحصح لو كشخت على روحي !!! بس للأسف مش داير مفعوله معاي!
هل هذا عجز في أدمغتنا “مانبيش نقول غباء” اننا نكونوا في حاجة لهواتف ذكية ومنبهات ذكية؟
اللي يعاني من مشكلتي وخاطره في المنبه “الذكي” اللي حكيت عليه يلقاه في play store بتاع الاندرويد، اسمه : “I can’t wake up”
التوقيع: سيدة عادية.. وكسولة !
بالفلاقي

تجربتي مع تعليم منزلي صيف 2015


edited_kukijahmi_2015-06-09_19-53-11
اللي عنده نفس طويل يقرا .. بنهدرز على تجربتي مع تعليم منزلي جزئي..

امس كنت نحكي مع صديقة عزيزة على مواضيع واجدة.. ختمتها معاها اني نصحتها تستعمل تطبيق البنترست pinterest لاني استفدت منه جدددا ومازلت في كل كبيرة وصغير
المهم قلتلها ادير بحث على homeschooling اي التعليم المنزلي لاطفالها حتستمتع هي وهم يستفيدوا خصوصا الاطفال اللي في عمر الروضة preschoolers >> وخاشة توة مخصوص باش تشاركوني تجربتي هذه اللي كانت برعاية pinterest >> (نقنع في نفسي اني مدايرة كنترول جو خاشة مخصوص ما مخصوص خخخخخ)

لما كملت المنهج اللي نعطي فيه في المدرسة وافتكيت من هالمسؤولية الكبيرة، فكرت ندير برنامج لصغاري في الصيف نعلمهم بطريقة مسلية

الهدف:هم يستفيدوا وفي نفس الوقت يغيرروا جو ونخليهم يحبوا القراية .. مبكرا ..عشان مدارسنا يخلوا الطفل يكره القراية من صف اول ..
ما علينا..

استعنت بالله .. طلعت مبلغ بسيط تقريبا 200 دينار وجهزتلهم فصل صغير (كان عبارة عن دار خزين) ابدوا من السبورة لعند اقلام الرصاص والمحايات .. (الدوة هذي في مايو 2015 يعني عالحال اللي توة اضربوا هالرقم في 5)
حطيتلهم قوانين اهمها ان حاجة الفصل ماتطلعش برة منه لاي سبب كان، خصوصا الالوان والصلصال ..

بعدها خشيت pinterest وبحثت عن المادة المناسبة عشان نقريهم.. وطبعا النتائج كانت مذهلة .. ماتتعبوش نفسكم وتبحثوا بالعربي لان المكتبة العربية فقيرة .. ابحثوا بالانجليزي وحتلقوا مادة غزيييييرة .. وكنت مضطرة عشان نعلمهم الحروف العربية ونعلم يمنى بعض الكلمات اني نستعين بافكار وشيتات انجليزية ونجهز بنفسي اوراق عمل بدل ما ناخذها جاهزة

كان جدولنا يحتوي : تحفيظ القران (السور اللي ياخذوا فيها صف اول ابتدائي)
+ السلوك والتربية (جبت كتب المسلم الصغير من مكتبة الفرجاني وكتاب الدين بتاع صف اول قداش حلو)
+ الحروف العربية (التعرف عليها وطريقة كتابتها واستخراجها من الكلمات )
+ الحروف الانجليزية (ماركزتش عليها واجد بس حفظتهم بعض الكلمات اللي تبدا بيها الحروف)
+ الرياضيات (التلوين بالارقام، التعرف عليهم، يمنى حفظت لعند 30 ومؤمن طبعا لصغر سنه لل10، توصيل الارقام لاكمال صورة، الفرق بين الكبير والصغير والطويل والقصير، الاشكال الهندسية، ويمنى خشت عالجمع والطرح بس مازال مش متمكنة لان برنامجنا تلخبط)
+ جغرافيا (الكواكب، والفصول الاربعة و خريطة ليبيا وموقع اهم المدن فيها، اعلام بعض الدول وعواصمها)
+ تاريخ (قصص القران باعتبارها تاريخ مش مجرد قصص، والانسان البدائي وهذا استعنت بموسوعة تاريخنا)
+علوم (الكائنات الحية وغير الحية، جسم الانسان، الحواس الخمس، حيوانات الغابة والمزرعة..)

والبرنامج تضمن اشغال يدوية واناشيد .. ويوم للرسم عالوجه وتمثيل القصص اللي يحبوها ..

طبعا في شهر رمضان تلخبط شوية البرنامج ونقصت فترة الدراسة، وبعد ما جبت “أميرة” الحلوة heart emoticon انقطعنا ..

لو في طابعة متوفرة تقدروا تبدوا من اليوم، ولو مافيش مش مشكلة تقدروا تستعينوا بالافكار وتنفذوها يدويا بدل ما تطبعوا
الراعي الرسمي بنترست: اعتمدت عليه بنسبة 90% .. حتلقوا مئات المواقع اللي تقدم اوراق عمل worksheets مجانية ومغرية عليها رسومات وفيها افكار خيال غير للتذكير: ابحثوا بالانجليزي

النتيجة: حب غير عادي للتعلم والمعرفة، لدرجة اني مرات نقول شن درت في عمري .. ماعاش يبوا يبطلوا زنين كل يوم يبوني نعلمهم ويمنى ماتبطلش اسئلة ..

والحمدلله الهدف تحقق ..
على الله مايطيحوش في ابلة تهدم اللي بنيته

التوقيع: سيدة عادية

 

بالفلاقي

“وعسى أن تكرهوا شيئا وهو خير لكم..”


الصحة تاج على رؤوس الأصحاء لا يراه إلا المرضى.. هذا المثل ينطبق على أمور أخرى في حياتنا غير الصحة والمرض نحب نورد منهم حالتين عشان صديقات عزيزات عليا..

Continue reading ““وعسى أن تكرهوا شيئا وهو خير لكم..””

بالفلاقي

عيد الطفل الغوه!


توة بغض النظر هل يصح الاحتفال بعيد الام وعيد الطفل ام لا وهل هن ابتداع او لا.. اولا ماهنش اعياد دينية عشان نقولوا هذي بدعة في الدين، واي نعم صحيح اننا يفترض بينا نكرموا امهاتنا كل يوم في السنة مش يوم واحد في السنة، بس شن ذنب الاطفال؟ دقيقة من فضلك جاوبني..  Continue reading “عيد الطفل الغوه!”